talab-garan-e-taKHt-o-taj zi-jah-o-hasham nikle

talab-gārān-e-taḳht-o-tāj zī-jāh-o-hasham nikle

havas ke bande sab minnat-kash-e-dair-o-haram nikle

shahādat mil ga.ī yā fat.h-o-nusrat pā ke lauTe haiñ

jihād-e-fī-sabīlillāh meñ jab bhī qadam nikle

bisāt-e-jang ulaT kar rah ga.ī tārīḳh shāhid hai

amāme bāñdh kar apne saroñ se jab bhī ham nikle

kabhī tishna-labī kī baat hoñToñ tak na aane dī

tumhārī bazm-e-rangīñ kā sadā rakh kar bharam nikle

na jaane kis ne dard-o-ġham ko ye rasta batāyā thā

ye mehmāñ ghar se jab nikle to le ke merā dam nikle

vo kyoñ shānoñ pe yuuñ zulf-e-pareshāñ ko jhaTakte haiñ

jigar ke zaḳhm shāyad un ke andāze se kam nikle

'razā' chaliye ki tauhīn-e-talab se bach ga.e ham bhī

tavaqqo' jin se thī vo ḳhud hī mohtāj-e-karam nikle

talab-garan-e-taKHt-o-taj zi-jah-o-hasham nikle

hawas ke bande sab minnat-kash-e-dair-o-haram nikle

shahadat mil gai ya fath-o-nusrat pa ke lauTe hain

jihad-e-fi-sabilillah mein jab bhi qadam nikle

bisat-e-jang ulaT kar rah gai tariKH shahid hai

amame bandh kar apne saron se jab bhi hum nikle

kabhi tishna-labi ki baat honTon tak na aane di

tumhaari bazm-e-rangin ka sada rakh kar bharam nikle

na jaane kis ne dard-o-gham ko ye rasta bataya tha

ye mehman ghar se jab nikle to le ke mera dam nikle

wo kyon shanon pe yun zulf-e-pareshan ko jhaTakte hain

jigar ke zaKHm shayad un ke andaze se kam nikle

'raza' chaliye ki tauhin-e-talab se bach gae hum bhi

tawaqqo' jin se thi wo KHud hi mohtaj-e-karam nikle