طلب نواز اشارے ہزار ملتے ہیں

طلب نواز اشارے ہزار ملتے ہیں

جو ہو نظر تو نظارے ہزار ملتے ہیں

جواں ہو عزم سفر تو اندھیری راتوں میں

چراغ راہ ستارے ہزار ملتے ہیں

بڑھے سفینہ ملا کر جو آنکھ طوفاں سے

تو موج غم میں کنارے ہزار ملتے ہیں

جنوں کو گیسوئے برہم کے سائے کی ہے تلاش

وگرنہ زلف سنوارے ہزار ملتے ہیں

نیاز مند ہو شایان چشم ناز کوئی

نگاہ ناز کے مارے ہزار ملتے ہیں

اگر خلوص سفر ہو تو ٹھوکروں سے بھی

مسافروں کو سہارے ہزار ملتے ہیں

کوئی کلی بھی شریک خزاں نہیں جوہرؔ

چمن کے راج دلارے ہزار ملتے ہیں