talab-nawaz ishaare hazar milte hain

talab-navāz ishāre hazār milte haiñ

jo ho nazar to nazāre hazār milte haiñ

javāñ ho azm-e-safar to añdherī rātoñ meñ

charāġh-e-rāh sitāre hazār milte haiñ

baḌhe safīna milā kar jo aañkh tūfāñ se

to mauj-e-ġham meñ kināre hazār milte haiñ

junūñ ko gesū-e-barham ke saa.e kī hai talāsh

vagarna zulf sañvāre hazār milte haiñ

niyāz-mand ho shāyān-e-chashm-e-nāz koī

nigāh-e-nāz ke maare hazār milte haiñ

agar ḳhulūs-e-safar ho to Thokaroñ se bhī

musāfiroñ ko sahāre hazār milte haiñ

koī kalī bhī sharīk-e-ḳhizāñ nahīñ 'jauhar'

chaman ke rāj-dulāre hazār milte haiñ

talab-nawaz ishaare hazar milte hain

jo ho nazar to nazare hazar milte hain

jawan ho azm-e-safar to andheri raaton mein

charagh-e-rah sitare hazar milte hain

baDhe safina mila kar jo aankh tufan se

to mauj-e-gham mein kinare hazar milte hain

junun ko gesu-e-barham ke sae ki hai talash

wagarna zulf sanware hazar milte hain

niyaz-mand ho shayan-e-chashm-e-naz koi

nigah-e-naz ke mare hazar milte hain

agar KHulus-e-safar ho to Thokaron se bhi

musafiron ko sahaare hazar milte hain

koi kali bhi sharik-e-KHizan nahin 'jauhar'

chaman ke raj-dulare hazar milte hain