talaf karegi kab tak aarzu ki jaan aarzu

talaf karegī kab tak aarzū kī jaan aarzū

taḌap rahī hai har taraf lahūluhān aarzū

phirā ke dīda-e-tapāñ meñ mom ke mujassame

kahāñ kahāñ karegī diid kā ziyān aarzū

zarā sā haath kyā lagā habāb sā bikhar gayā

jise samajh rahī thī ek āsmān aarzū

tū chashm hī meñ rah agar pasand hai kushādgī

ki dil hai tañg aur is meñ yak jahān aarzū

isī ke haiñ sabab se sab ye hijr kī sa.ūbateñ

kahāñ se aa ga.ī hamāre darmiyān aarzū

tū āftāb hai maiñ gul duā tire sukūn kī

kisī kī shaan qahr hai kisī kī shaan aarzū

ilāhī ḳhair itne sin pe āñdhiyoñ kī dostī

abhī to siikh paa.ī bhī nahīñ uḌaan aarzū

shajar hajar zamīn āsmān sab ko zo.af hai

magar ye ik javān kī rahī javān aarzū

talaf karegi kab tak aarzu ki jaan aarzu

taDap rahi hai har taraf lahuluhan aarzu

phira ke dida-e-tapan mein mom ke mujassame

kahan kahan karegi did ka ziyan aarzu

zara sa hath kya laga habab sa bikhar gaya

jise samajh rahi thi ek aasman aarzu

tu chashm hi mein rah agar pasand hai kushadgi

ki dil hai tang aur is mein yak jahan aarzu

isi ke hain sabab se sab ye hijr ki saubaten

kahan se aa gai hamare darmiyan aarzu

tu aaftab hai main gul dua tere sukun ki

kisi ki shan qahr hai kisi ki shan aarzu

ilahi KHair itne sin pe aandhiyon ki dosti

abhi to sikh pai bhi nahin uDan aarzu

shajar hajar zamin aasman sab ko zoaf hai

magar ye ek jawan ki rahi jawan aarzu