talKHi-e-ayyam rahn-e-jam ki

talḳhī-e-ayyām rahn-e-jām kī

bāda-ḳhāne meñ basar har shaam kī

bazm meñ saaqī kī chashm-e-mast ne

sharm rakh lī ek tishna-kām kī

kaash sun lete vo merī dāstāñ

baat rah jaatī dil-e-nākām kī

miT na paa.ī zindagī kī talḳhiyāñ

bāda-noshī ham ne go har shaam kī

ham kahāñ the is qadar be-rañg-o-nām

dosto gardish hai sub.h-o-shām kī

baada ḳhvāroñ ne na chalne dī koī

mai-kade meñ gardish-e-ayyām kī

is nigāh-e-muḳhtasar kā shukriya

baat ban aa.ī dil-e-nākām kī

āsī-e-kam-zarf ne hangām meñ

anjuman kī anjuman badnām kī

talKHi-e-ayyam rahn-e-jam ki

baada-KHane mein basar har sham ki

bazm mein saqi ki chashm-e-mast ne

sharm rakh li ek tishna-kaam ki

kash sun lete wo meri dastan

baat rah jati dil-e-nakaam ki

miT na pai zindagi ki talKHiyan

baada-noshi hum ne go har sham ki

hum kahan the is qadar be-rang-o-nam

dosto gardish hai subh-o-sham ki

baada KHwaron ne na chalne di koi

mai-kade mein gardish-e-ayyam ki

is nigah-e-muKHtasar ka shukriya

baat ban aai dil-e-nakaam ki

aasi-e-kam-zarf ne hangam mein

anjuman ki anjuman badnam ki