talKHi-e-haalat-e-dauran ka bayan hai zindagi

talḳhī-e-hālāt-e-daurāñ kā bayāñ hai zindagī

dard-o-ġham kī ik musalsal dāstāñ hai zindagī

allāh allāh ye safar ye raah ye dushvāriyāñ

vaqt ke shānoñ pe ik bār-e-girāñ hai zindagī

jin kī halchal meñ hai tūfānī havāoñ kā ḳharosh

un taḌaptī ārzūoñ kā jahāñ hai zindagī

shiddat-e-ehsās-e-nākāmī kī ātish-gāh se

ḳhirman-e-jazbāt par shola-fishāñ hai zindagī

hai kise ab zindagī ke dard-e-pinhāñ kī ḳhabar

apnī barbādī kī ḳhud hī rāz-dāñ hai zindagī

ye umīdoñ kā chaman hai rashk-e-sad husn-e-chaman

is chaman kī ik bahār-e-jāvedāñ hai zindagī

hai usī ke nuur se tābānī-e-kaun-o-makāñ

zulmat-e-bazm-e-jahāñ meñ zau-fishāñ hai zindagī

us kī marzī par hai har qaid o rihā.ī munhasir

ḳhud qafas hai aur ḳhud hī āshiyāñ hai zindagī

'naqsh' dard-e-qaum hai qalb o jigar meñ shola-zan

jazba-e-ahl-e-vatan kī tarjumāñ hai zindagī

talKHi-e-haalat-e-dauran ka bayan hai zindagi

dard-o-gham ki ek musalsal dastan hai zindagi

allah allah ye safar ye rah ye dushwariyan

waqt ke shanon pe ek bar-e-giran hai zindagi

jin ki halchal mein hai tufani hawaon ka KHarosh

un taDapti aarzuon ka jahan hai zindagi

shiddat-e-ehsas-e-nakaami ki aatish-gah se

KHirman-e-jazbaat par shola-fishan hai zindagi

hai kise ab zindagi ke dard-e-pinhan ki KHabar

apni barbaadi ki KHud hi raaz-dan hai zindagi

ye umidon ka chaman hai rashk-e-sad husn-e-chaman

is chaman ki ek bahaar-e-jawedan hai zindagi

hai usi ke nur se tabani-e-kaun-o-makan

zulmat-e-bazm-e-jahan mein zau-fishan hai zindagi

us ki marzi par hai har qaid o rihai munhasir

KHud qafas hai aur KHud hi aashiyan hai zindagi

'naqsh' dard-e-qaum hai qalb o jigar mein shola-zan

jazba-e-ahl-e-watan ki tarjuman hai zindagi