تلخی ہوئی تو لب پہ تراوٹ نہیں رہی

تلخی ہوئی تو لب پہ تراوٹ نہیں رہی

چہرے پہ بھولے پن کی بناوٹ نہیں رہی

جب عاشقی کا باغ یہ ویران ہو گیا

تو در پہ پہلے جیسی سجاوٹ نہیں رہی

مضمون جب سے آپ کے خط کا بدل گیا

ویسی حسین تب سے لکھاوٹ نہیں رہی

کھڑکی کے اپنی اس نے بھی پردے گرا لیے

میری بھی راستے کی رکاوٹ نہیں رہی

زینت نئے مکان کی جب سے وہ بن گئے

قیمت میں ان کی تب سے گراوٹ نہیں رہی

حالات زندگی میں مرے ایسے ہو گئے

جس میں ملے اسی سے ملاوٹ نہیں رہی

جب تک تھا نرم صرف سبھی توڑتے رہے

پتھر ہوا یہ دل تو گھساوٹ نہیں رہی

مجبوریوں سے ہاتھ ملاتے ابھےؔ رہے

تھکنا الگ ہے بات تھکاوٹ نہیں رہی