تلخی جو مرے دل میں غم زیست نے گھولی

تلخی جو مرے دل میں غم زیست نے گھولی

وہ میں نے تمنا کی حلاوت میں سمو لی

چھڑکا مرے دامن پہ مرا خون تمنا

کیا ایسے ہی ہوتی ہے ترے راج میں ہولی

پکڑا ہی گیا چور توجہ کا سر بزم

کھیلی تھی نگاہوں سے مری آنکھ مچولی

یوں مست نگاہوں سے نا کر دست درازی

پیراہن تمکیں کی مسک جائے نہ چولی

جو اس کے ارادے میں نہ مرہم تھی نہ نشتر

میں نے وہ نظر آپ ہی سینے میں چبھو لی

گلشن تھا نہ محفل تھی نہ ساقی تھا نہ میکشؔ

جھپکا کے ذرا میں نے پلک آنکھ جو کھولی