talKHis ke badan mein tafsir bolti hai

talḳhīs ke badan meñ tafsīr boltī hai

takmīl-e-ārzū meñ tadbīr boltī hai

ye mo.ajiza bhī dekhā ham ne kalām-e-fan kā

chup ho agar musavvir tasvīr boltī hai

taz.īn-e-anjuman ke ham ne jo ḳhvāb dekhe

ab kirchiyoñ meñ un kī ta.abīr boltī hai

vo lab-kushā ho jis dam lagtā hai har kisī ko

har lafz meñ usī kī taqdīr boltī hai

bantā hai muflisoñ kā vo ġham-gusār lekin

andāz-e-guftugū meñ jāgīr boltī hai

jazboñ pe laakh koī pābandiyāñ lagā de

iz.hār meñ unhī kī tāsīr boltī hai

ḳhāmosh haiñ qafas ke dīvār-o-dar to kyā hai

Takrā ke har qadam se zanjīr boltī hai

jab āgahī kā azhdar Dastā hai aadmī ko

mafhūm nāchte haiñ tahrīr boltī hai

talKHis ke badan mein tafsir bolti hai

takmil-e-arzu mein tadbir bolti hai

ye moajiza bhi dekha hum ne kalam-e-fan ka

chup ho agar musawwir taswir bolti hai

tazin-e-anjuman ke hum ne jo KHwab dekhe

ab kirchiyon mein un ki tabir bolti hai

wo lab-kusha ho jis dam lagta hai har kisi ko

har lafz mein usi ki taqdir bolti hai

banta hai muflison ka wo gham-gusar lekin

andaz-e-guftugu mein jagir bolti hai

jazbon pe lakh koi pabandiyan laga de

izhaar mein unhi ki tasir bolti hai

KHamosh hain qafas ke diwar-o-dar to kya hai

Takra ke har qadam se zanjir bolti hai

jab aagahi ka azhdar Dasta hai aadmi ko

mafhum nachte hain tahrir bolti hai