Talne ke nahin ahl-e-wafa KHauf-e-ziyan se

Talne ke nahīñ ahl-e-vafā ḳhauf-e-ziyāñ se

ye bahs magar kaun kare ahl-e-zamāñ se

rag rag meñ ravāñ bahr-e-fuġhāñ chaḌh gayā lekin

vīrānī-e-jāñ kam to huī zikr-e-butāñ se

roġhan na safedī na marammat se milegā

ik pās-e-marātib ki gayā sab ke makāñ se

āzār-o-musībat se ilāqa hai purānā

rishta hai qadīmī mirā fariyād-o-fuġhāñ se

ghaav bhī zarā taak ke yāroñ ne lagā.e

kuchh dil ko bhī nisbat thī bahut nok-e-sināñ se

ik gosha-e-dil us ko dikhāne kā nahīñ ye

mahram nahīñ karnā use ik sirr-e-nihāñ se

sarsabz rahe zaḳhm-e-junūñ jis kī badaulat

ik rabt to qaa.em hai adū-e-dil-o-jāñ se

Talne ke nahin ahl-e-wafa KHauf-e-ziyan se

ye bahs magar kaun kare ahl-e-zaman se

rag rag mein rawan bahr-e-fughan chaDh gaya lekin

virani-e-jaan kam to hui zikr-e-butan se

roghan na safedi na marammat se milega

ek pas-e-maraatib ki gaya sab ke makan se

aazar-o-musibat se ilaqa hai purana

rishta hai qadimi mera fariyaad-o-fughan se

ghaw bhi zara tak ke yaron ne lagae

kuchh dil ko bhi nisbat thi bahut nok-e-sinan se

ek gosha-e-dil us ko dikhane ka nahin ye

mahram nahin karna use ek sirr-e-nihan se

sarsabz rahe zaKHm-e-junun jis ki badaulat

ek rabt to qaem hai adu-e-dil-o-jaan se