tamam aalam-e-hasti hai ek nazar ka fareb

tamām ālam-e-hastī hai ik nazar kā fareb

kabhī hai shaam kā dhokā kabhī sahar kā fareb

na khā.eñge kabhī duniyā ke māl-o-zar kā fareb

jo khā chuke haiñ tirī chashm-e-ishva-gar kā fareb

uḌe chaman se to uḌ kar qafas-nasīb hue

ye jānte to na ham khāte bāl-o-par kā fareb

ham aur baḌh ga.e kuchh duur terī manzil se

ye ham-safar kā fusūñ thā ki rāhbar kā fareb

Thahar ga.e dam-e-ruḳhsat ba-ḳhauf-e-bārish-o-barq

vo khā ga.e dil-e-betāb-o-chashm-e-tar kā fareb

har ek gaam pe tū ne biThā diye rahzan

phir us pe hukm hai khānā na rahguzar kā fareb

pahuñch gayā tire hamnām ke yahāñ shāyad

batā rahā hai ḳhat-e-nāz-e-nāma-bar kā fareb

tumhāre jalva-e-raushan kī hai ye tābānī

na khaao vasl kī shab tābish-e-sahar kā fareb

kisī ke jalva-e-avval ne vo sitam Dhaa.e

ki ham na khā.eñge ab jalva-e-digar kā fareb

qadam to tez haiñ manzil magar hanūz hai duur

har ek gaam pe khāte haiñ ham-safar kā fareb

umīd-e-vasl meñ kaaTī tamām raat 'valī'

sahar huī to khulā la.al-e-hīla-gar kā fareb

tamam aalam-e-hasti hai ek nazar ka fareb

kabhi hai sham ka dhoka kabhi sahar ka fareb

na khaenge kabhi duniya ke mal-o-zar ka fareb

jo kha chuke hain teri chashm-e-ishwa-gar ka fareb

uDe chaman se to uD kar qafas-nasib hue

ye jaante to na hum khate baal-o-par ka fareb

hum aur baDh gae kuchh dur teri manzil se

ye ham-safar ka fusun tha ki rahbar ka fareb

Thahar gae dam-e-ruKHsat ba-KHauf-e-barish-o-barq

wo kha gae dil-e-betab-o-chashm-e-tar ka fareb

har ek gam pe tu ne biTha diye rahzan

phir us pe hukm hai khana na rahguzar ka fareb

pahunch gaya tere hamnam ke yahan shayad

bata raha hai KHat-e-naz-e-nama-bar ka fareb

tumhaare jalwa-e-raushan ki hai ye tabani

na khao wasl ki shab tabish-e-sahar ka fareb

kisi ke jalwa-e-awwal ne wo sitam Dhae

ki hum na khaenge ab jalwa-e-digar ka fareb

qadam to tez hain manzil magar hanuz hai dur

har ek gam pe khate hain ham-safar ka fareb

umid-e-wasl mein kaTi tamam raat 'wali'

sahar hui to khula lal-e-hila-gar ka fareb