تمام عیش و طرب اور سکون ایک طرف

تمام عیش و طرب اور سکون ایک طرف

عطائے عشق ہمارا جنون ایک طرف

مکاں میں کھڑکیاں دیوار و در ضروری ہیں

مگر جو روکے ہے چھت وہ ستون ایک طرف

اسی مہینے میں تم چھوڑ کر گئے تھے مجھے

نکال دوں گی کلینڈر سے جون ایک طرف

میں زندگی کے سبق ایک اور رکھتی ہوں

تمام حکمت و علم و فنون ایک طرف

ہے ایک اور اشارہ تری نگاہوں کا

زمانہ بھر کے سبھی افلاطون ایک طرف

بنا کے بھیجوں گی اس بار عشق کا سوئیٹر

نکال کے ابھی رکھ لی ہے اون ایک طرف

رگوں میں ویسے تو ہر وقت دوڑتا ہے ؔشکھا

مگر جو آنکھ سے ٹپکا وہ خون ایک طرف