tamam aish-o-tarab aur sukun ek taraf

tamām aish-o-tarab aur sukūn ek taraf

atā-e-ishq hamārā junūn ek taraf

makāñ meñ khiḌkiyāñ dīvār-o-dar zarūrī haiñ

magar jo roke hai chhat vo sutūn ek taraf

isī mahīne meñ tum chhoḌ kar ga.e the mujhe

nikāl dūñgī calender se june ek taraf

maiñ zindagī ke sabaq ek or rakhtī huuñ

tamām hikmat-o-ilm-o-funūn ek taraf

hai ek aur ishāra tirī nigāhoñ kā

zamāna bhar ke sabhī aflātūn ek taraf

banā ke bhejūñgī is baar ishq kā sweater

nikāl ke abhī rakh lī hai uun ek taraf

ragoñ meñ vaise to har vaqt dauḌtā hai 'shikhā'

magar jo aañkh se Tapkā vo ḳhuun ek taraf

tamam aish-o-tarab aur sukun ek taraf

ata-e-ishq hamara junun ek taraf

makan mein khiDkiyan diwar-o-dar zaruri hain

magar jo roke hai chhat wo sutun ek taraf

isi mahine mein tum chhoD kar gae the mujhe

nikal dungi calender se june ek taraf

main zindagi ke sabaq ek or rakhti hun

tamam hikmat-o-ilm-o-funun ek taraf

hai ek aur ishaara teri nigahon ka

zamana bhar ke sabhi aflatun ek taraf

bana ke bhejungi is bar ishq ka sweater

nikal ke abhi rakh li hai un ek taraf

ragon mein waise to har waqt dauDta hai 'shikha'

magar jo aankh se Tapka wo KHun ek taraf