tamam aish-o-tarab hain faqat usi ke liye

tamām aish-o-tarab haiñ faqat usī ke liye

ḳhirad se kaam liyā jis ne zindagī ke liye

ye irtiqā-e-ḳhirad hai ki intihā-e-junūñ

junūñ-navāz bane haiñ jo āgahī ke liye

chamak rahe haiñ jo qatrāt-e-ḳhūñ sar-e-mizhgāñ

ye ehtimām-e-charāġhāñ hai aap hī ke liye

jahāñ gumān bhī ho aap ke guzarne kā

vahīñ jhukā diyā sar maiñ ne bandagī ke liye

mah-o-nujūm pe Daalī ga.ī kamand-e-shu.ūr

ye iltizām hai do din kī zindagī ke liye

ye jashn-e-aish-o-tarab aap hī ke dam se hai

hue haiñ aap to paidā hī dilbarī ke liye

lahū se apne jalā kar charāġh āñkhoñ meñ

harīm-e-dil ko sajāyā hai aap hī ke liye

usī ke vāste chamke haiñ kaukab-e-taqdīr

charāġh-e-hosh bhī raushan hai aadmī ke liye

samajh sakā na anal-haq ke raaz ko 'ḳhāvar'

ye ek khel thā irfāñ ke muntahī ke liye

tamam aish-o-tarab hain faqat usi ke liye

KHirad se kaam liya jis ne zindagi ke liye

ye irtiqa-e-KHirad hai ki intiha-e-junun

junun-nawaz bane hain jo aagahi ke liye

chamak rahe hain jo qatraat-e-KHun sar-e-mizhgan

ye ehtimam-e-charaghan hai aap hi ke liye

jahan guman bhi ho aap ke guzarne ka

wahin jhuka diya sar main ne bandagi ke liye

mah-o-nujum pe Dali gai kamand-e-shuur

ye iltizam hai do din ki zindagi ke liye

ye jashn-e-aish-o-tarab aap hi ke dam se hai

hue hain aap to paida hi dilbari ke liye

lahu se apne jala kar charagh aankhon mein

harim-e-dil ko sajaya hai aap hi ke liye

usi ke waste chamke hain kaukab-e-taqdir

charagh-e-hosh bhi raushan hai aadmi ke liye

samajh saka na anal-haq ke raaz ko 'KHawar'

ye ek khel tha irfan ke muntahi ke liye