tamam fitnon se KHud ko bacha liya maine

tamām fitnoñ se ḳhud ko bachā liyā maiñ ne

munāfiqīn se pīchhā chhuḌā liyā maiñ ne

na jaane kis liye zahmat uThā rahe haiñ log

darāz qad bhī jab apnā ghaTā liyā maiñ ne

shanāḳht ho sake jis se fareb-kāroñ kī

janāb-e-vālā vo chashma lagā liyā maiñ ne

mirī anā pe zarā bhī kahīñ jo harf aayā

to āsmān ko sar par uThā liyā maiñ ne

tujhe maiñ tark karūñ kis tarah ġhazal-goī

tujhe to ziist kā hissa banā liyā maiñ ne

hue shikār jo ahbāb bad-gumānī ke

unheñ bhī husn-e-vafā se manā liyā maiñ ne

masarratoñ se bahut ghuT rahā thā dam 'ālam'

ġham-e-hayāt ko apnā banā liyā maiñ ne

tamam fitnon se KHud ko bacha liya main ne

munafiqin se pichha chhuDa liya main ne

na jaane kis liye zahmat uTha rahe hain log

daraaz qad bhi jab apna ghaTa liya main ne

shanaKHt ho sake jis se fareb-karon ki

janab-e-wala wo chashma laga liya main ne

meri ana pe zara bhi kahin jo harf aaya

to aasman ko sar par uTha liya main ne

tujhe main tark karun kis tarah ghazal-goi

tujhe to zist ka hissa bana liya main ne

hue shikar jo ahbab bad-gumani ke

unhen bhi husn-e-wafa se mana liya main ne

masarraton se bahut ghuT raha tha dam 'alam'

gham-e-hayat ko apna bana liya main ne