tamam galiyon mein matam bapa tha jangal ka

tamām galiyoñ meñ mātam bapā thā jañgal kā

yahāñ zarūr koī silsila thā jañgal kā

likhī thiiñ vahshateñ sahrā kī merī āñkhoñ meñ

kitāb-e-dil meñ varaq khul rahā thā jañgal kā

hamāre shahroñ meñ ab roz hotā rahtā hai

vo vāqi.a jo kabhī vāqi.a thā jañgal kā

vo is taraf kī pahāḌī pe mīThe jharne the

pa darmiyān meñ rasta ghanā thā jañgal kā

mujh ek shahr meñ aisā bhī thā udaas koī

hamesha mujh se pata pūchhtā thā jañgal kā

kisī ke saath ne insāñ banā diyā hai ise

vagarna dil ye kabhī bheḌiyā thā jañgal kā

jahāñ pe ḳhatm thī insāniyat kī had 'at.har'

vahāñ pe dekhā to ik rāsta thā jañgal kā

tamam galiyon mein matam bapa tha jangal ka

yahan zarur koi silsila tha jangal ka

likhi thin wahshaten sahra ki meri aankhon mein

kitab-e-dil mein waraq khul raha tha jangal ka

hamare shahron mein ab roz hota rahta hai

wo waqia jo kabhi waqia tha jangal ka

wo is taraf ki pahaDi pe miThe jharne the

pa darmiyan mein rasta ghana tha jangal ka

mujh ek shahr mein aisa bhi tha udas koi

hamesha mujh se pata puchhta tha jangal ka

kisi ke sath ne insan bana diya hai ise

wagarna dil ye kabhi bheDiya tha jangal ka

jahan pe KHatm thi insaniyat ki had 'athar'

wahan pe dekha to ek rasta tha jangal ka