tamam jalwe hain raushan jamal-e-yar hai ek

tamām jalve haiñ raushan jamāl-e-yār hai ek

hazāroñ phuul khile haiñ magar bahār hai ek

shuā.eñ lākhoñ haiñ ḳhurshīd-e-zar-nigār hai ek

karoḌoñ qatre haiñ dariyā-e-be-kanār hai ek

bharī huī haiñ sharābeñ ḳhumoñ meñ rangā-rang

maze haiñ sab ke judāgāna par ḳhumār hai ek

karoḌoñ būñdeñ haiñ lekin hai ek abr-e-matīr

karishme bū-qalamūñ haiñ nigāh-e-yār hai ek

haqīqat ek hai lekin haiñ laakh afsāne

hazāroñ chashme haiñ jaarī par ābshār hai ek

hai ek sham.a-e-tajallī hazār parvāne

hazāroñ naġhme chhiḌe haiñ magar sitār hai ek

base hue haiñ hazāroñ dimāġh ḳhushbū se

shamīm-e-silsila-e-zulf-e-mushk-bār hai ek

hai ek ḳhvāb-e-haqīqat hazār ta.abīreñ

haiñ rāste mutafarriq maqām-e-yār hai ek

'valī' ḳhalal nahīñ kasrat se asl vahdat meñ

hazār bhī dur-e-shahvār hoñ to haar hai ek

tamam jalwe hain raushan jamal-e-yar hai ek

hazaron phul khile hain magar bahaar hai ek

shuaen lakhon hain KHurshid-e-zar-nigar hai ek

karoDon qatre hain dariya-e-be-kanar hai ek

bhari hui hain sharaben KHumon mein ranga-rang

maze hain sab ke judagana par KHumar hai ek

karoDon bunden hain lekin hai ek abr-e-matir

karishme bu-qalamun hain nigah-e-yar hai ek

haqiqat ek hai lekin hain lakh afsane

hazaron chashme hain jari par aabshaar hai ek

hai ek shama-e-tajalli hazar parwane

hazaron naghme chhiDe hain magar sitar hai ek

base hue hain hazaron dimagh KHushbu se

shamim-e-silsila-e-zulf-e-mushk-bar hai ek

hai ek KHwab-e-haqiqat hazar tabiren

hain raste mutafarriq maqam-e-yar hai ek

'wali' KHalal nahin kasrat se asl wahdat mein

hazar bhi dur-e-shahwar hon to haar hai ek