tamam jism agar la-ubaal hai to rahe

tamām jism agar lā-ubāl hai to rahe

vahī jo dasht meñ tanhā ġhazāl hai to rahe

faqīr bhuul chukā hai nisāb duniyā kā

tire nasīb meñ māl-o-manāl hai to rahe

'azīz rakhtī hai mujh ko vatan kī ḳhaak bahut

tire ḳhulūs meñ ranj-o-malāl hai to rahe

kiyā hai jang ko ruḳhsat magar du'ā de kar

'adū ke paas agar us kī Dhaal hai to rahe

talāsh karne ko nikle bahut se log tujhe

nishān qadmoñ kā milnā muhāl hai to rahe

hisār bāñdh rahī hai 'nisār' sarshārī

ḳhilāf aaj junūb-o-shumāl hai to rahe

tamam jism agar la-ubaal hai to rahe

wahi jo dasht mein tanha ghazal hai to rahe

faqir bhul chuka hai nisab duniya ka

tere nasib mein mal-o-manal hai to rahe

'aziz rakhti hai mujh ko watan ki KHak bahut

tere KHulus mein ranj-o-malal hai to rahe

kiya hai jang ko ruKHsat magar du'a de kar

'adu ke pas agar us ki Dhaal hai to rahe

talash karne ko nikle bahut se log tujhe

nishan qadmon ka milna muhaal hai to rahe

hisar bandh rahi hai 'nisar' sarshaari

KHilaf aaj junub-o-shumal hai to rahe