tamam jism hi ghayal tha ghaw aisa tha

tamām jism hī ghāyal thā ghaav aisā thā

koī na jaan sakā rakh-rakhāo kaisā thā

bas ik kahānī huī ye paḌāv aisā thā

mirī chitā kā bhī manzar alaav aisā thā

vo ham ko dekhtā rahtā thā ham taraste the

hamārī chhat se vahāñ tak dikhāv aisā thā

kuchh aisī sāñseñ bhī lenā paḌīñ jo bojhal thiiñ

havā kā chāroñ taraf se dabāv aisā thā

ḳharīdte to ḳharīdār ḳhud bhī bik jaate

tape hue khare sone kā bhaav aisā thā

haiñ dā.ere meñ qadam ye na ho sakā mahsūs

rah-e-hayāt meñ yaaro ghumāo aisā thā

koī Thahar na sakā maut ke samundar tak

hayāt aisī nadī thī bahāv aisā thā

bas us kī maañg meñ sindūr bhar ke lauT aa.e

hamāre agle janam kā chunāv aisā thā

phir is ke ba.ad jhuke to jhuke ḳhudā kī taraf

tumhārī samt hamārā jhukāv aisā thā

vo jis kā ḳhuun thā vo bhī shanāḳht kar na sakā

hatheliyoñ pe lahū kā rachāv aisā thā

zabāñ se kuchh na kahūñgā ġhazal ye hāzir hai

dimāġh meñ ka.ī din se tanāv aisā thā

fareb de hī gayā 'nūr' us nazar kā ḳhulūs

fareb khā hī gayā maiñ subhāv aisā thā

tamam jism hi ghayal tha ghaw aisa tha

koi na jaan saka rakh-rakhao kaisa tha

bas ek kahani hui ye paDaw aisa tha

meri chita ka bhi manzar alaw aisa tha

wo hum ko dekhta rahta tha hum taraste the

hamari chhat se wahan tak dikhaw aisa tha

kuchh aisi sansen bhi lena paDin jo bojhal thin

hawa ka chaaron taraf se dabaw aisa tha

KHaridte to KHaridar KHud bhi bik jate

tape hue khare sone ka bhaw aisa tha

hain daere mein qadam ye na ho saka mahsus

rah-e-hayat mein yaro ghumao aisa tha

koi Thahar na saka maut ke samundar tak

hayat aisi nadi thi bahaw aisa tha

bas us ki mang mein sindur bhar ke lauT aae

hamare agle janam ka chunaw aisa tha

phir is ke baad jhuke to jhuke KHuda ki taraf

tumhaari samt hamara jhukaw aisa tha

wo jis ka KHun tha wo bhi shanaKHt kar na saka

hatheliyon pe lahu ka rachaw aisa tha

zaban se kuchh na kahunga ghazal ye hazir hai

dimagh mein kai din se tanaw aisa tha

fareb de hi gaya 'nur' us nazar ka KHulus

fareb kha hi gaya main subhaw aisa tha