tamam KHushiyan tamam sapne hum ek duje ke nam kar ke

tamām ḳhushiyāñ tamām sapne ham ek duuje ke naam kar ke

nibhā.eñ ulfat kī saarī rasmeñ vafāoñ kā ehtimām kar ke

na duur dil se kabhī tū jaanā dil-o-jigar meñ maqām kar ke

piyāla-e-ishq ulaT na denā ai sāqiyā mai-ba-jām kar ke

rahī na mujh meñ sakat zarā bhī ki zulm tere sahūñ musalsal

milegā kyā tujh ko ai sitamgar ġhamoñ kā yuuñ azhdahām kar ke

maiñ in kī nazroñ ke tiir khā kar taḌap rahā huuñ yahāñ pe lekin

vo kitne be-fikr lag rahe haiñ sukūn merā harām kar ke

miTānī hai jo diloñ kī duurī to falsafa hai ye āzmūda

charāġh-e-ulfat jalā.eñ ham tum diloñ kī nafrat ko raam kar ke

masarratoñ ke husūl kā hai jahāñ meñ bas ik yahī tarīqa

ki sādgī se nibāh kar lo talab ke jin ko ġhulām kar ke

jahān-e-dil kī is iztirārī se bāhar aa kar chalo chaleñ 'shād'

ḳhushī kī mahfil ko phir sajā.eñ udāsiyoñ ko harām kar ke

tamam KHushiyan tamam sapne hum ek duje ke nam kar ke

nibhaen ulfat ki sari rasmen wafaon ka ehtimam kar ke

na dur dil se kabhi tu jaana dil-o-jigar mein maqam kar ke

piyala-e-ishq ulaT na dena ai saqiya mai-ba-jam kar ke

rahi na mujh mein sakat zara bhi ki zulm tere sahun musalsal

milega kya tujh ko ai sitamgar ghamon ka yun azhdaham kar ke

main in ki nazron ke tir kha kar taDap raha hun yahan pe lekin

wo kitne be-fikr lag rahe hain sukun mera haram kar ke

miTani hai jo dilon ki duri to falsafa hai ye aazmuda

charagh-e-ulfat jalaen hum tum dilon ki nafrat ko ram kar ke

masarraton ke husul ka hai jahan mein bas ek yahi tariqa

ki sadgi se nibah kar lo talab ke jin ko ghulam kar ke

jahan-e-dil ki is iztirari se bahar aa kar chalo chalen 'shad'

KHushi ki mahfil ko phir sajaen udasiyon ko haram kar ke