tamam moajaze sari shahadaten le kar

tamām mo.ajaze saarī shahādateñ le kar

maiñ aab o ḳhaak se guzrā adāvateñ le kar

ḳhud apne harf ke sho.ale meñ jal ke lauTā huuñ

maiñ ik safar pe gayā thā hikāyateñ le kar

kashāñ-kashāñ lab-e-sāhil utar ga.ī mujh meñ

udaas raat samundar kī vus.ateñ le kar

had-e-zamān-o-makāñ se guzar rahā huuñ maiñ

ḳhud apne hone na hone kī hairateñ le kar

abhī to zaḳhm sile the ki āsmāñ se koī

mirī taraf chalā aayā jarāhateñ le kar

zamīñ ke logo suno hashr ab na uTThegā

guzar gayā koī saarī qayāmateñ le kar

akelā shahr meñ phirtā huuñ saarā din 'sābir'

maiñ apne bichhḌe huoñ kī shabāhateñ le kar

tamam moajaze sari shahadaten le kar

main aab o KHak se guzra adawaten le kar

KHud apne harf ke shoale mein jal ke lauTa hun

main ek safar pe gaya tha hikayaten le kar

kashan-kashan lab-e-sahil utar gai mujh mein

udas raat samundar ki wusaten le kar

had-e-zaman-o-makan se guzar raha hun main

KHud apne hone na hone ki hairaten le kar

abhi to zaKHm sile the ki aasman se koi

meri taraf chala aaya jarahaten le kar

zamin ke logo suno hashr ab na uTThega

guzar gaya koi sari qayamaten le kar

akela shahr mein phirta hun sara din 'sabir'

main apne bichhDe huon ki shabahaten le kar