tamam rasta phulon bhara tumhaara tha

tamām rāsta phūloñ bharā tumhārā thā

hamārī raah meñ bas naqsh-e-pā hamārā thā

us ek sā.at-e-shab kā ḳhumār yaad kareñ

badan ke lams ko jab ham ne mil ke bāñTā thā

vo ek lamha jise tum ne chhū ke chhoḌ diyā

us ek lamhe meñ kaif-e-visāl saarā thā

phir is ke baa'd nigāhoñ ne kuchh nahīñ dekhā

na jaane kaun thā jo sāmne se guzrā thā

ab us ke naam pe dil ne dhḌaknā chhoḌ diyā

vo jis ko ham ne kabhī be-hisāb chāhā thā

vo jis ko dekhā thā aksar hujūm-e-yārāñ meñ

vo ek shaḳhs bahut un dinoñ akelā thā

tamām saut-o-sadā chup se ho ga.e the 'zubair'

vo jab sukūt ke patthar pe gir ke TuuTā thā

tamam rasta phulon bhara tumhaara tha

hamari rah mein bas naqsh-e-pa hamara tha

us ek saat-e-shab ka KHumar yaad karen

badan ke lams ko jab hum ne mil ke banTa tha

wo ek lamha jise tum ne chhu ke chhoD diya

us ek lamhe mein kaif-e-visal sara tha

phir is ke ba'd nigahon ne kuchh nahin dekha

na jaane kaun tha jo samne se guzra tha

ab us ke nam pe dil ne dhDakna chhoD diya

wo jis ko hum ne kabhi be-hisab chaha tha

wo jis ko dekha tha aksar hujum-e-yaran mein

wo ek shaKHs bahut un dinon akela tha

tamam saut-o-sada chup se ho gae the 'zubair'

wo jab sukut ke patthar pe gir ke TuTa tha