tamam raat aansuon se gham ujalta raha

tamām raat āñsuoñ se ġham ujāltā rahā

maiñ ġham ujaal ujaal kar ḳhushī meñ Dhāltā rahā

javān merī himmateñ buland mere hausle

hisār toḌtā rahā kamand Dāltā rahā

bahut hī talḳh tajraba tumhārī bazm meñ huā

har aadmī mirī anā ke bal nikāltā rahā

haiñ iltavā kī god ke palle sab us ke mas.ale

kisī ko hal nahīñ kiyā hamesha Tāltā rahā

tire ḳhilāf is liye mirī zabāñ na khul sakī

maiñ apnī ḳhāmiyoñ pe bhī nigāh Dāltā rahā

ḳhayāl-e-yār terī nigahdāsht is tarah huī

dimāġh thak ke so gayā to dil sambhāltā rahā

'hafīz' kyā sunā.ūñ apnī ḳhvāhishoñ kī dāstāñ

pilā pilā ke duudh kitne saañp pāltā rahā

tamam raat aansuon se gham ujalta raha

main gham ujal ujal kar KHushi mein Dhaalta raha

jawan meri himmaten buland mere hausle

hisar toDta raha kamand Dalta raha

bahut hi talKH tajraba tumhaari bazm mein hua

har aadmi meri ana ke bal nikalta raha

hain iltawa ki god ke palle sab us ke masale

kisi ko hal nahin kiya hamesha Talta raha

tere KHilaf is liye meri zaban na khul saki

main apni KHamiyon pe bhi nigah Dalta raha

KHayal-e-yar teri nigahdasht is tarah hui

dimagh thak ke so gaya to dil sambhaalta raha

'hafiz' kya sunaun apni KHwahishon ki dastan

pila pila ke dudh kitne sanp palta raha