tamam rang hawa ho gae kahani se

tamām rañg havā ho ga.e kahānī se

zamīn kaañp rahī hai utarte paanī se

vo ik parinda-e-ātish jo aag piitā thā

asiir ho gayā apnī hī ḳhush-bayānī se

shikār chhup ga.e apnī panāh-gāhoñ meñ

kamān TuuT ga.ī us kī khīñchā-tānī se

jo khel khel rahe the havāoñ kī shah par

vo khel ḳhatm huā marg-e-nā-gahānī se

ḳhud apne aap se larzāñ rahī ulajhtī rahī

uThā na bār-e-garāñ raat kī javānī se

varaq varaq pe chalā tesha-e-qalam lekin

na koī lafz judā ho sakā ma.ānī se

tamam rang hawa ho gae kahani se

zamin kanp rahi hai utarte pani se

wo ek parinda-e-atish jo aag pita tha

asir ho gaya apni hi KHush-bayani se

shikar chhup gae apni panah-gahon mein

kaman TuT gai us ki khincha-tani se

jo khel khel rahe the hawaon ki shah par

wo khel KHatm hua marg-e-na-gahani se

KHud apne aap se larzan rahi ulajhti rahi

uTha na bar-e-garan raat ki jawani se

waraq waraq pe chala tesha-e-qalam lekin

na koi lafz juda ho saka maani se