tamam rishte usi shaKH-e-be-samar se hain

tamām rishte usī shāḳh-e-be-samar se haiñ

talāsh unhī ko hai ghar kī jo nikle ghar se haiñ

shanāḳht kī ye kahānī bas ek nasl kī hai

phir is ke ba.ad fasāne idhar udhar se haiñ

abhī ḳhabar nahīñ nau-vāridān-e-hijrat ko

kahāñ se uTThe haiñ bādal kahāñ pe barse haiñ

qadam uThe nahīñ ma.alūm manziloñ kī taraf

magar udaas ham andesha-e-safar se haiñ

bas aañkh khulte hī tābīr-e-ḳhvāb mil jaa.e

ye kis tarah ke taqāze hameñ sahar se haiñ

nigāh rakhte haiñ sayyārgāñ kī nabz pe ham

aur apne chāroñ taraf kitne be-ḳhabar se haiñ

tamam rishte usi shaKH-e-be-samar se hain

talash unhi ko hai ghar ki jo nikle ghar se hain

shanaKHt ki ye kahani bas ek nasl ki hai

phir is ke baad fasane idhar udhar se hain

abhi KHabar nahin nau-waridan-e-hijrat ko

kahan se uTThe hain baadal kahan pe barse hain

qadam uThe nahin malum manzilon ki taraf

magar udas hum andesha-e-safar se hain

bas aankh khulte hi tabir-e-KHwab mil jae

ye kis tarah ke taqaze hamein sahar se hain

nigah rakhte hain sayyargan ki nabz pe hum

aur apne chaaron taraf kitne be-KHabar se hain