تمام شہر کے لوگوں کو ہم نوا کرنا

تمام شہر کے لوگوں کو ہم نوا کرنا

ہمارے عکس میں پرچھائیاں بنا کرنا

عجیب ریت ہے شہر نگار یاراں کی

کہ پیار کہہ کے عداوت کی ابتدا کرنا

جو اپنے خواب میں کاسہ بدست پائے گئے

انہی پہ قرض ہے اپنے لیے دعا کرنا

ہم اپنے سارے حوالوں سے چھپتے پھرتے ہیں

ہمیں عذاب ہے رستوں میں فیصلہ کرنا

صدا کے حق میں دریچے تمام بند ہوئے

کرن سکھانے لگی روزنوں کو وا کرنا

شب سیہ نے ستاروں کا ساتھ چھوڑ دیا

کٹھن ہوا ہے مسافر کو راستہ کرنا

نیا بہانہ ہے مصروف خود کو رکھنے کا

جہاں چراغ جلانا وہیں ہوا کرنا

ہم اپنی ذات کا امکان بھر تحفظ تھے

کہ خود میں اترے تو شکل ہوا جدا کرنا

حمیراؔ بڑھتے ہوئے دائروں کا رنگ حصار

اور اس پہ خوف کہ جینے پر اکتفا کرنا