tamam shahr ke logon ko ham-nawa karna

tamām shahr ke logoñ ko ham-navā karnā

hamāre 'aks meñ parchhā.iyāñ bunā karnā

'ajīb riit hai shahr-e-nigār-e-yārāñ kī

ki pyaar kah ke 'adāvat kī ibtidā karnā

jo apne ḳhvāb meñ kāsa-ba-dast paa.e ga.e

unhī pe qarz hai apne liye du'ā karnā

ham apne saare havāloñ se chhupte phirte haiñ

hameñ 'azāb hai rastoñ meñ faisla karnā

sadā ke haq meñ darīche tamām band hue

kiran sikhāne lagī rauzanoñ ko vā karnā

shab-e-siyah ne sitāroñ kā saath chhoḌ diyā

kaThin huā hai musāfir ko rāsta karnā

nayā bahāna hai masrūf ḳhud ko rakhne kā

jahāñ charāġh jalānā vahīñ havā karnā

ham apnī zaat kā imkān-bhar tahaffuz the

ki ḳhud meñ utre to shakl-e-havā judā karnā

'humairā' baḌhte hue dā.eroñ kā rang-e-hisār

aur us pe ḳhauf ki jiine par iktifā karnā

tamam shahr ke logon ko ham-nawa karna

hamare 'aks mein parchhaiyan buna karna

'ajib rit hai shahr-e-nigar-e-yaran ki

ki pyar kah ke 'adawat ki ibtida karna

jo apne KHwab mein kasa-ba-dast pae gae

unhi pe qarz hai apne liye du'a karna

hum apne sare hawalon se chhupte phirte hain

hamein 'azab hai raston mein faisla karna

sada ke haq mein dariche tamam band hue

kiran sikhane lagi rauzanon ko wa karna

shab-e-siyah ne sitaron ka sath chhoD diya

kaThin hua hai musafir ko rasta karna

naya bahana hai masruf KHud ko rakhne ka

jahan charagh jalana wahin hawa karna

hum apni zat ka imkan-bhar tahaffuz the

ki KHud mein utre to shakl-e-hawa juda karna

'humaira' baDhte hue daeron ka rang-e-hisar

aur us pe KHauf ki jine par iktifa karna