tamam shahr tha jangal sa inT patthar ka

tamām shahr thā jañgal sā iiñT patthar kā

ġhazab vo dekh ke aayā huuñ bād-e-sarsar kā

sadā.eñ chashme ubalne kī aa rahī haiñ mujhe

kisī ne toḌ diyā kyā sukūt patthar kā

milā hai ḳhāk-nashīnī se ye maqām mujhe

zamīñ hai taḳht falak taaj hai mire sar kā

mujhe to koī bhī mausam uḌā nahīñ saktā

ki maiñ to rañg huuñ us ke adhūre manzar kā

ravāñ kiyā hai mujhe kin bulandiyoñ kī taraf

ki āsmān bhī lagtā hai saaya shah-par kā

maiñ apnā ghar to jalā ke safar pe niklā thā

ḳhayāl dasht meñ aayā faqat tire dar kā

sunā.ī detī nahīñ hai ab apnī aahaT bhī

ravāñ huā hai har ik samt shor andar kā

jab āftāb sā mujh par huā thā raushan tū

mujhe hai yaad vo yaḳh-basta din december kā

havā-e-lams meñ ik aag bhī thī poshīda

ki tābnāk huā jism sañg-e-marmar kā

zahe-nasīb mohammad kā nām-levā huuñ

hai laakh shukr ḳhudā-e-buzurg-o-bartar kā

tamam shahr tha jangal sa inT patthar ka

ghazab wo dekh ke aaya hun baad-e-sarsar ka

sadaen chashme ubalne ki aa rahi hain mujhe

kisi ne toD diya kya sukut patthar ka

mila hai KHak-nashini se ye maqam mujhe

zamin hai taKHt falak taj hai mere sar ka

mujhe to koi bhi mausam uDa nahin sakta

ki main to rang hun us ke adhure manzar ka

rawan kiya hai mujhe kin bulandiyon ki taraf

ki aasman bhi lagta hai saya shah-par ka

main apna ghar to jala ke safar pe nikla tha

KHayal dasht mein aaya faqat tere dar ka

sunai deti nahin hai ab apni aahaT bhi

rawan hua hai har ek samt shor andar ka

jab aaftab sa mujh par hua tha raushan tu

mujhe hai yaad wo yaKH-basta din december ka

hawa-e-lams mein ek aag bhi thi poshida

ki tabnak hua jism sang-e-marmar ka

zahe-nasib mohammad ka nam-lewa hun

hai lakh shukr KHuda-e-buzurg-o-bartar ka