tamam umr guzari hai KHair maine bhi

tamām umr guzārī hai ḳhair maiñ ne bhī

kahīñ na lagne diye apne pair maiñ ne bhī

vo ek dariyā jo ḳhushkī pe chaḌh ke Duub gayā

liyā hai thoḌā bahut us meñ tair maiñ ne bhī

ḳhayāl-e-yār sarāsar tirī muravvat meñ

kiyā hai apnī hī hālat ko ġhair maiñ ne bhī

bas apne halqa-e-ahbāb kī himāyat meñ

phir apne saath kamāyā hai bair maiñ ne bhī

vo gul-badan bhī to ab baaġh meñ nahīñ aatā

isī liye to ye chhoḌī hai sair maiñ ne bhī

sajā ke rakkhā hai dil meñ baḌe qarīne se

tumhārī yaad ko yādash-ba-ḳhair maiñ ne bhī

vahī jo kaam kiyā kohkan ne teshe se

kiyā hai kaam vo teshe baġhair maiñ ne bhī

butoñ se dil kā ta'alluq hai cholī-dāman kā

haram ke saath banāyā hai dair maiñ ne bhī

tamam umr guzari hai KHair main ne bhi

kahin na lagne diye apne pair main ne bhi

wo ek dariya jo KHushki pe chaDh ke Dub gaya

liya hai thoDa bahut us mein tair main ne bhi

KHayal-e-yar sarasar teri murawwat mein

kiya hai apni hi haalat ko ghair main ne bhi

bas apne halqa-e-ahbab ki himayat mein

phir apne sath kamaya hai bair main ne bhi

wo gul-badan bhi to ab bagh mein nahin aata

isi liye to ye chhoDi hai sair main ne bhi

saja ke rakkha hai dil mein baDe qarine se

tumhaari yaad ko yaadash-ba-KHair main ne bhi

wahi jo kaam kiya kohkan ne teshe se

kiya hai kaam wo teshe baghair main ne bhi

buton se dil ka ta'alluq hai choli-daman ka

haram ke sath banaya hai dair main ne bhi