tamam-umr ki ghaflat ke baad KHwab aaya

tamām-umr kī ġhaflat ke ba.ad ḳhvāb aayā

uThā jo parda-e-hastī mujhe hijāb aayā

ajal-nasīb thā shām-e-visāl ḳhvāb aayā

vo be-hijāb hue to mujhe hijāb aayā

balā hai ahd-e-javānī se ḳhush na ho ai dil

sambhal ki umr kī duniyā meñ inqalāb aayā

baḌhā.e hausle dariyā-dilī ne saaqī kī

zarā se jaam meñ sau baar āftāb aayā

koī sadā nahīñ aatī ki kaun hai kyā hai

kahāñ bhaTak ke dil-e-ḳhānumāñ-ḳharāb aayā

ummīd-o-bīm meñ rakkhā tamām raat mujhe

kabhī naqāb uThā.ī kabhī hijāb aayā

zamāne vāloñ ko pahchānñe diyā na kabhī

badal badal ke libās apne inqalāb aayā

sivā.e yaas na kuchh gumbad-e-falak se milā

sadā bhī dī to palaT kar vahī javāb aayā

uḌā ke hosh huā ho ga.ī tajallī-e-tūr

sabhoñ se aañkh churātā huā hijāb aayā

harīf-e-mai nahīñ samjhā to kyuuñ mirī jānib

lahū ke ghūñT piye sāġhar-e-sharāb aayā

haTe na apnī tabī.at se husn-o-ishq kabhī

hazār baar zamāne meñ inqalāb aayā

sunā.īñ kyā tumheñ nairañg-e-ishq kā qissa

tamām-umr na āñkheñ khulīñ na ḳhvāb aayā

khaTak vo dil meñ hī paidā jo aaj tak na huī

samajh rahā huuñ ki tiflī ga.ī shabāb aayā

kafan pinhā diyā 'sāqib' sanam-parastī ne

ḳhudā ke sāmne jaate hue hijāb aayā

tamam-umr ki ghaflat ke baad KHwab aaya

uTha jo parda-e-hasti mujhe hijab aaya

ajal-nasib tha sham-e-visal KHwab aaya

wo be-hijab hue to mujhe hijab aaya

bala hai ahd-e-jawani se KHush na ho ai dil

sambhal ki umr ki duniya mein inqalab aaya

baDhae hausle dariya-dili ne saqi ki

zara se jam mein sau bar aaftab aaya

koi sada nahin aati ki kaun hai kya hai

kahan bhaTak ke dil-e-KHanuman-KHarab aaya

ummid-o-bim mein rakkha tamam raat mujhe

kabhi naqab uThai kabhi hijab aaya

zamane walon ko pahchanne diya na kabhi

badal badal ke libas apne inqalab aaya

siwae yas na kuchh gumbad-e-falak se mila

sada bhi di to palaT kar wahi jawab aaya

uDa ke hosh hua ho gai tajalli-e-tur

sabhon se aankh churaata hua hijab aaya

harif-e-mai nahin samjha to kyun meri jaanib

lahu ke ghunT piye saghar-e-sharab aaya

haTe na apni tabiat se husn-o-ishq kabhi

hazar bar zamane mein inqalab aaya

sunain kya tumhein nairang-e-ishq ka qissa

tamam-umr na aankhen khulin na KHwab aaya

khaTak wo dil mein hi paida jo aaj tak na hui

samajh raha hun ki tifli gai shabab aaya

kafan pinha diya 'saqib' sanam-parasti ne

KHuda ke samne jate hue hijab aaya