تمام زندگی تسکین آرزو نہ ہوئی

تمام زندگی تسکین آرزو نہ ہوئی

کہ جیسی چاہی تھی ویسی تو گفتگو نہ ہوئی

میں دل کے زخموں کا اظہار کس طرح کرتا

جب آنکھ ہی ترے غم میں لہو لہو نہ ہوئی

بتا رہی ہے یہی چاک دامنی میری

مری حیات کی چادر کبھی رفو نہ ہوئی

کسی کے بہتے ہوئے اشک پی لئے تھے کبھی

پھر اس کے بعد مجھے حاجت سبو نہ ہوئی

وہ دیکھتا ہے غریبوں کو یوں حقارت سے

کہ جیسے ان کی یہاں کوئی آبرو نہ ہوئی

کسی کی ایک جھلک طور کر گئی تھی مجھے

کسی کے دید کی پھر دل میں آرزو نہ ہوئی