tamasha apna sar-e-rah-guzar banaya jae

tamāsha apnā sar-e-rah-guzar banāyā jaa.e

jo rāhzan hai use rāhbar banāyā jaa.e

salīqa ye bhī to hai sar uThā ke jiine kā

jo ham meñ aib haiñ in ko hunar banāyā jaa.e

tamām umr isī kaam meñ rahe masrūf

har ek dil meñ mohabbat kā dar banāyā jaa.e

ḳhushī kā kyā hai hamesha fareb detī hai

to apne ġham ko hī ab mo'atabar banāyā jaa.e

jahāñ na paḌ sake saaya bhī koī nafrat kā

mohabbatoñ kā ik aisā nagar banāyā jaa.e

abhī nuqūsh numāyāñ nahīñ hue haiñ mire

tarāsh kar mujhe bār-e-digar banāyā jaa.e

koī nahīñ abhī tayyār saath chalne ko

so apne saa.e ko hī ham-safar banāyā jaa.e

sab apnī zaat meñ gum haiñ ye soch kar 'nāyāb'

parā.e dard ko kyuuñ dard-e-sar banāyā jaa.e

tamasha apna sar-e-rah-guzar banaya jae

jo rahzan hai use rahbar banaya jae

saliqa ye bhi to hai sar uTha ke jine ka

jo hum mein aib hain in ko hunar banaya jae

tamam umr isi kaam mein rahe masruf

har ek dil mein mohabbat ka dar banaya jae

KHushi ka kya hai hamesha fareb deti hai

to apne gham ko hi ab mo'atabar banaya jae

jahan na paD sake saya bhi koi nafrat ka

mohabbaton ka ek aisa nagar banaya jae

abhi nuqush numayan nahin hue hain mere

tarash kar mujhe bar-e-digar banaya jae

koi nahin abhi tayyar sath chalne ko

so apne sae ko hi ham-safar banaya jae

sab apni zat mein gum hain ye soch kar 'nayab'

parae dard ko kyun dard-e-sar banaya jae