تماشا بن گئیں نظریں جہاں دیکھا جدھر دیکھا

تماشا بن گئیں نظریں جہاں دیکھا جدھر دیکھا

ترے جلوؤں میں گم ہو کر تجھی کو جلوہ گر دیکھا

بس اتنا طور پر جا کر تجلی کا اثر دیکھا

کہ موسیٰ نے خود اپنے آپ کو بھی بے خبر دیکھا

سکوں ملنا کجا تڑپا دیا بیمار ہجراں کو

عجب انداز دل جوئی ترا اے چارہ گر دیکھا

وہ عیسیٰ ہو کہ ہو منصور یا اہل وفا کوئی

ہمیشہ تیرے دیوانوں کو ہم نے دار پر دیکھا

ہوا ہے جب سے دل میرا گرفتار اسیر غم

نہ نالے ہی رسا دیکھے نہ آہوں میں اثر دیکھا

نہ ہو کیوں لائق صد آفریں دیوانۂ ہستی

اسی جانب چلا ہے راستہ جو پر خطر دیکھا

مسیحائی تمہاری شہرۂ آفاق ہے لیکن

کسی درد آشنا دل کو بھی تم نے جھانک کر دیکھا