tamasha-e-wahm-o-yaqin aur kya hai

tamāshā-e-vahm-o-yaqīñ aur kyā hai

ye hangāma-e-kufr-o-dīñ aur kyā hai

hadīs-e-mohabbat kī takmīl-e-zāhir

hamārā dam-e-vāpsīñ aur kyā hai

vahī nūr-e-akmal jo hai ġhair faanī

ziyā-e-ruḳh-e-ātishīñ aur kyā hai

mujhe duur rakh kar lubhāne kī koshish

tamāshā-e-ḳhuld-e-barīñ aur kyā hai

kisī kī tavajjoh kī zinda haqīqat

mirā e'tiqād o yaqīñ aur kyā hai

tire husn kā ek adnā sā partav

ye tanvīr-e-māh-e-mubīñ aur kyā hai

ba-juz ek naqsh-e-kaf-e-pā-e-jānāñ

mirī sajda-gāh-e-yaqīñ aur kyā hai

tirī zulf-e-mushkīñ kī ḳhushbū-e-dilkash

shamīm-e-gul-o-yāsmīñ aur kyā hai

bashīr us ke jalvoñ kī tāsīr-e-dilkash

mohabbat kā naqsh-e-hasīñ aur kyā hai

tamasha-e-wahm-o-yaqin aur kya hai

ye hangama-e-kufr-o-din aur kya hai

hadis-e-mohabbat ki takmil-e-zahir

hamara dam-e-wapsin aur kya hai

wahi nur-e-akmal jo hai ghair fani

ziya-e-ruKH-e-atishin aur kya hai

mujhe dur rakh kar lubhane ki koshish

tamasha-e-KHuld-e-barin aur kya hai

kisi ki tawajjoh ki zinda haqiqat

mera e'tiqad o yaqin aur kya hai

tere husn ka ek adna sa partaw

ye tanwir-e-mah-e-mubin aur kya hai

ba-juz ek naqsh-e-kaf-e-pa-e-jaanan

meri sajda-gah-e-yaqin aur kya hai

teri zulf-e-mushkin ki KHushbu-e-dilkash

shamim-e-gul-o-yasmin aur kya hai

bashir us ke jalwon ki tasir-e-dilkash

mohabbat ka naqsh-e-hasin aur kya hai