tamasha-ha-e-sahr-e-kun-fakan hum dekh aae hain

tamāshā-hā-e-sahr-e-kun-fakāñ ham dekh aa.e haiñ

tirī shāhī ke sab rāz-e-nihāñ ham dekh aa.e haiñ

ḳhizāñ-āvāra patte kyuuñ havā meñ raqs karte haiñ

ye ham se pūchh lo sab īn-o-āñ ham dekh aa.e haiñ

tirī tasvīr meñ ye rang-e-hairat ḳhuun hai apnā

likhā kyā hai sar-e-aurāq-e-jāñ ham dekh aa.e haiñ

lagī thī aag kis ghar meñ nahīñ ma.alūm hai lekin

uThā thā aañkh se kis kī dhuāñ ham dekh aa.e haiñ

jo tere harf sun leñ vo kisī kī phir nahīñ sunte

tire lab kā vo ejāz-e-bayāñ ham dekh aa.e haiñ

tamasha-ha-e-sahr-e-kun-fakan hum dekh aae hain

teri shahi ke sab raaz-e-nihan hum dekh aae hain

KHizan-awara patte kyun hawa mein raqs karte hain

ye hum se puchh lo sab in-o-an hum dekh aae hain

teri taswir mein ye rang-e-hairat KHun hai apna

likha kya hai sar-e-auraq-e-jaan hum dekh aae hain

lagi thi aag kis ghar mein nahin malum hai lekin

uTha tha aankh se kis ki dhuan hum dekh aae hain

jo tere harf sun len wo kisi ki phir nahin sunte

tere lab ka wo ejaz-e-bayan hum dekh aae hain