tamasha ho jo dil mein aks-e-ru-e-yar ho paida

tamāshā ho jo dil meñ aks-e-rū-e-yār ho paidā

ki apnā ishq kā ik mahram-e-asrār ho paidā

ruḳh-o-gesū dikhā kar naaz se kahtā hai vo dilbar

koī kāfir ho paidā aur koī dīñ-dār ho paidā

tumhārī silk-dandāñ ke tasavvur ne rulāyā hai

na kyuuñ ashkoñ se mere gauhar-e-shahvār ho paidā

kahīñ muñh phertā hai jāñ-nisār-e-ishq marne se

fidā vo jaan kar le tujh pe gar sau baar ho paidā

agar girya-kunāñ sarshār-e-ulfat huuñ to ai saaqī

unhīñ ke āñsuoñ se bāda-e-gulnār ho paidā

mudāvā ġhair-mumkin hai tire bīmār-e-ulfat kā

jo ik āzār achchhā ho to ik āzār ho paidā

'jamīla' nāvak-e-mizhgān-e-dil-bar se jo ho zaḳhmī

na kyuuñ us kī lahad par nargis-e-bīmār ho paidā

tamasha ho jo dil mein aks-e-ru-e-yar ho paida

ki apna ishq ka ek mahram-e-asrar ho paida

ruKH-o-gesu dikha kar naz se kahta hai wo dilbar

koi kafir ho paida aur koi din-dar ho paida

tumhaari silk-dandan ke tasawwur ne rulaya hai

na kyun ashkon se mere gauhar-e-shahwar ho paida

kahin munh pherta hai jaan-nisar-e-ishq marne se

fida wo jaan kar le tujh pe gar sau bar ho paida

agar girya-kunan sarshaar-e-ulfat hun to ai saqi

unhin ke aansuon se baada-e-gulnar ho paida

mudawa ghair-mumkin hai tere bimar-e-ulfat ka

jo ek aazar achchha ho to ek aazar ho paida

'jamila' nawak-e-mizhgan-e-dil-bar se jo ho zaKHmi

na kyun us ki lahad par nargis-e-bimar ho paida