tamashai bane rahiye tamasha dekhte rahiye

tamāshā.ī bane rahiye tamāshā dekhte rahiye

yahī duniyā hai to kab tak ye duniyā dekhte rahiye

agar apne bikharne kā nazāra kar nahīñ sakte

to ye kiije ki vo raushan sitāra dekhte rahiye

ki yuuñ manzar badal jaane se hairānī nahīñ hotī

agar gulshan meñ rahnā ho to sahrā dekhte rahiye

miyāñ kyā ā.īñe ko khelne kī chiiz samjhe the

ab apne-āp ko qistoñ meñ baTtā dekhte rahiye

idhar tum pyaas kī hurmat kā qissa chheḌ baiThe ho

udhar mausam ye kahtā hai ki dariyā dekhte rahiye

tamashai bane rahiye tamasha dekhte rahiye

yahi duniya hai to kab tak ye duniya dekhte rahiye

agar apne bikharne ka nazara kar nahin sakte

to ye kije ki wo raushan sitara dekhte rahiye

ki yun manzar badal jaane se hairani nahin hoti

agar gulshan mein rahna ho to sahra dekhte rahiye

miyan kya aaine ko khelne ki chiz samjhe the

ab apne-ap ko qiston mein baTta dekhte rahiye

idhar tum pyas ki hurmat ka qissa chheD baiThe ho

udhar mausam ye kahta hai ki dariya dekhte rahiye