tamanna ban gai hai maya-e-ilzam kya hoga

tamannā ban ga.ī hai māya-e-ilzām kyā hogā

magar dil hai abhī tak tishna-e-paiġhām kyā hogā

vo betāb-e-tamāsha hī sahī ai tāb-e-nazzāra

laraz uThtā hai dil ye soch kar anjām kyā hogā

yahāñ jo kuchh bhī hai vo partav-e-ehsās hai saaqī

ba-juz baada javāb-e-gardish-e-ayyām kyā hogā

kabhī jis ke yaqīñ se kā.enāt-e-ishq raushan thī

vahī ab hai asīr-e-halqa-e-auhām kyā hogā

junūn-e-shauq kā aalam hama mastī sahī lekin

ye aalam bhī javāb-e-shoḳhi-e-paiġhām kyā hogā

chale to ho mizāj-e-yār kī pursish ko ai 'bekal'

magar ye soch lo andāz-e-istifhām kyā hogā

tamanna ban gai hai maya-e-ilzam kya hoga

magar dil hai abhi tak tishna-e-paigham kya hoga

wo betab-e-tamasha hi sahi ai tab-e-nazzara

laraz uThta hai dil ye soch kar anjam kya hoga

yahan jo kuchh bhi hai wo partaw-e-ehsas hai saqi

ba-juz baada jawab-e-gardish-e-ayyam kya hoga

kabhi jis ke yaqin se kaenat-e-ishq raushan thi

wahi ab hai asir-e-halqa-e-auham kya hoga

junun-e-shauq ka aalam hama masti sahi lekin

ye aalam bhi jawab-e-shoKHi-e-paigham kya hoga

chale to ho mizaj-e-yar ki pursish ko ai 'bekal'

magar ye soch lo andaz-e-istifham kya hoga