tamanna hai tamanna mein teri ji se guzar jaen

tamannā hai tamannā meñ tirī jī se guzar jaa.eñ

yahī hai aarzū apnī isī ḳhvāhish meñ mar jaa.eñ

gunāhoñ meñ samā jaa.eñ kaleje meñ utar jaa.eñ

mirī duniyā-e-hastī meñ tire jalve bikhar jaa.eñ

na duniyā meñ Thikāna hai na uqbā meñ Thikāna hai

tire bande agar jaanā bhī chāheñ to kidhar jaa.eñ

tire rindoñ meñ ai saaqī bhalā itnī kahāñ tāqat

bachā kar apnā dāman mai-kade se vo guzar jaa.eñ

luTā kar dīn-o-duniyā anjuman meñ terī aa.e the

yahāñ se uTh kar ab ham Thokareñ khāne kahāñ jaa.eñ

hamāre daur-e-māzī kī na ham se pūchh ai 'hamdam'

vahī achchhe haiñ lamhe zindagī ke jo guzar jaa.eñ

tamanna hai tamanna mein teri ji se guzar jaen

yahi hai aarzu apni isi KHwahish mein mar jaen

gunahon mein sama jaen kaleje mein utar jaen

meri duniya-e-hasti mein tere jalwe bikhar jaen

na duniya mein Thikana hai na uqba mein Thikana hai

tere bande agar jaana bhi chahen to kidhar jaen

tere rindon mein ai saqi bhala itni kahan taqat

bacha kar apna daman mai-kade se wo guzar jaen

luTa kar din-o-duniya anjuman mein teri aae the

yahan se uTh kar ab hum Thokaren khane kahan jaen

hamare daur-e-mazi ki na hum se puchh ai 'hamdam'

wahi achchhe hain lamhe zindagi ke jo guzar jaen