تمیز کافر و مومن خرد کی بے بصری

تمیز کافر و مومن خرد کی بے بصری

قیود دیر و حرم ہیں دلیل کم نظری

وہ عشق کیا کہ ہو نا آشنائے جذب و جنوں

وہ زخم کیا کہ ہو احسان مند چارہ گری

مجھے خلوص نے لوٹا تو کچھ مروت نے

ادا شناس وفا کی نہ پوچھ حیلہ گری

بغیر سوز تمنا فسون و افسانہ

فغان نیم شبی ہو کہ نالۂ سحری

یہ مجھ کو کون سی منزل میں عشق لے آیا

نہ کام آئی دل نکتہ داں کی نکتہ وری

گلوں سے صحن چمن ہے ابھی تہی دامن

سکھاؤ غنچۂ تازہ کو فن جامہ وری

ہوس نے دام بچھائے ہیں ہر طرف فاروقؔ

بتان عصر کی مجھ سے نہ پوچھ فتنہ گری