tamiz-e-kafir-o-momin KHirad ki be-basari

tamīz-e-kāfir-o-momin ḳhirad kī be-basarī

quyūd-e-dair-o-haram haiñ dalīl-e-kam-nazarī

vo ishq kyā ki ho nā-āshnā-e-jazb-o-junūñ

vo zaḳhm kyā ki ho ehsānmand-e-chāragarī

mujhe ḳhulūs ne luuTā to kuchh muravvat ne

adā-shanās-e-vafā kī na pūchh hīla-garī

baġhair soz-e-tamannā fusūn-o-afsāna

fuġhān-e-nīm-shabī ho ki nāla-e-saharī

ye mujh ko kaun sī manzil meñ ishq le aayā

na kaam aa.ī dil-e-nukta-dāñ kī nukta-varī

guloñ se sehn-e-chaman hai abhī tahī-dāman

sikhāo ġhuncha-e-tāza ko fann-e-jāma-varī

havas ne daam bichhā.e haiñ har taraf 'fārūq'

butān-e-asr kī mujh se na pūchh fitnagarī

tamiz-e-kafir-o-momin KHirad ki be-basari

quyud-e-dair-o-haram hain dalil-e-kam-nazari

wo ishq kya ki ho na-ashna-e-jazb-o-junun

wo zaKHm kya ki ho ehsanmand-e-chaaragari

mujhe KHulus ne luTa to kuchh murawwat ne

ada-shanas-e-wafa ki na puchh hila-gari

baghair soz-e-tamanna fusun-o-afsana

fughan-e-nim-shabi ho ki nala-e-sahari

ye mujh ko kaun si manzil mein ishq le aaya

na kaam aai dil-e-nukta-dan ki nukta-wari

gulon se sehn-e-chaman hai abhi tahi-daman

sikhao ghuncha-e-taza ko fann-e-jama-wari

hawas ne dam bichhae hain har taraf 'faruq'

butan-e-asr ki mujh se na puchh fitnagari