تن خاکی رہے گا ہمرہ انوار جاں کب تک

تن خاکی رہے گا ہمرہ انوار جاں کب تک

چلے گی کارواں کے ساتھ گرد کارواں کب تک

دل وارستہ کی وارستگی کا امتحاں کب تک

جفائے دشمناں کب تک وفائے دوستاں کب تک

ادھر بھی ایک جھونکا اے ہوائے فصل آزادی

رہوں زنجیرئ اندیشۂ سود و زیاں کب تک

نسیم فصل گل آئی نہ ان بارہ مہینوں میں

رہے گا باغ میں اے باغباں دور خزاں کب تک

نہ کیوں ہم دیدۂ خوں بار سے گل کاریاں کر لیں

رہیں آخر بہ امید بہار گل فشاں کب تک

وطن کی یاد مٹتے مٹتے مٹ جاتی ہے غربت میں

قفس میں تابش داغ فراق آشیاں کب تک

اجل آ کر بلند و پست کو ہموار کر دے گی

کوئی بالا نشیں کب تک کوئی پستی نشاں کب تک

سبک ہے یا گراں اے زندگی آخر ہے تو اپنی

تجھے اپنائیں گے تجھ سے رہیں گے سر گراں کب تک

اجاڑی جائے گی کب تک زمیں از بہر آبادی

لڑی جائیں گی جنگیں از پئے امن و اماں کب تک

صلہ حسن عمل کا خون دل ہے اس زمانے میں

مرے کام آئے گی رنگینئ حسن بیاں کب تک

وہی اک حسرت ناکام ہے اور اس کا رونا ہے

کئے جاؤ گے محرومؔ اس کو زیب داستاں کب تک