tan-e-KHaki rahega hamrah-e-anwar-e-jaan kab tak

tan-e-ḳhākī rahegā hamrah-e-anvār-e-jāñ kab tak

chalegī kārvāñ ke saath gard-e-kārvāñ kab tak

dil-e-vārasta kī vārastagī kā imtihāñ kab tak

jafā-e-dushmanāñ kab tak vafā-e-dostāñ kab tak

idhar bhī ek jhoñkā ai havā-e-fasl-e-āzādī

rahūñ zanjīrī-e-andesha-e-sūd-o-ziyāñ kab tak

nasīm-e-fasl-e-gul aa.ī na in bārah mahīnoñ meñ

rahegā baaġh meñ ai bāġhbāñ daur-e-ḳhizāñ kab tak

na kyuuñ ham dīda-e-ḳhūñ-bār se gul-kāriyāñ kar leñ

raheñ āḳhir ba-ummīd-e-bahār-e-gul-fashāñ kab tak

vatan kī yaad miTte miTte miT jaatī hai ġhurbat meñ

qafas meñ tābish-e-dāġh-e-firāq-e-āshiyāñ kab tak

ajal aa kar buland-o-past ko hamvār kar degī

koī bālā-nashīñ kab tak koī pastī-nishāñ kab tak

subuk hai yā garāñ ai zindagī āḳhir hai tū apnī

tujhe apnā.eñge tujh se raheñge sar-garāñ kab tak

ujāḌī jā.egī kab tak zamīñ az bahr-e-ābādī

laḌī jā.eñgī jangeñ az pai-e-amn-o-amāñ kab tak

sila husn-e-amal kā ḳhūn-e-dil hai is zamāne meñ

mire kaam aa.egī rangīnī-e-husn-e-bayāñ kab tak

vahī ik hasrat-e-nākām hai aur us kā ronā hai

kiye jāoge 'mahrūm' us ko zeb-e-dāstāñ kab tak

tan-e-KHaki rahega hamrah-e-anwar-e-jaan kab tak

chalegi karwan ke sath gard-e-karwan kab tak

dil-e-warasta ki warastagi ka imtihan kab tak

jafa-e-dushmanan kab tak wafa-e-dostan kab tak

idhar bhi ek jhonka ai hawa-e-fasl-e-azadi

rahun zanjiri-e-andesha-e-sud-o-ziyan kab tak

nasim-e-fasl-e-gul aai na in barah mahinon mein

rahega bagh mein ai baghban daur-e-KHizan kab tak

na kyun hum dida-e-KHun-bar se gul-kariyan kar len

rahen aaKHir ba-ummid-e-bahaar-e-gul-fashan kab tak

watan ki yaad miTte miTte miT jati hai ghurbat mein

qafas mein tabish-e-dagh-e-firaq-e-ashiyan kab tak

ajal aa kar buland-o-past ko hamwar kar degi

koi baala-nashin kab tak koi pasti-nishan kab tak

subuk hai ya garan ai zindagi aaKHir hai tu apni

tujhe apnaenge tujh se rahenge sar-garan kab tak

ujaDi jaegi kab tak zamin az bahr-e-abaadi

laDi jaengi jangen az pai-e-amn-o-aman kab tak

sila husn-e-amal ka KHun-e-dil hai is zamane mein

mere kaam aaegi rangini-e-husn-e-bayan kab tak

wahi ek hasrat-e-nakaam hai aur us ka rona hai

kiye jaoge 'mahrum' us ko zeb-e-dastan kab tak