tan-e-nahif ki KHatir rida nahin mangi

tan-e-nahīf kī ḳhātir ridā nahīñ māñgī

bahut dinoñ se ḳhudā se duā nahīñ māñgī

ḳhud apnī laash ko apne lahū se Dhāñpā hai

harī rutoñ se guloñ kī qabā nahīñ māñgī

chhatoñ pe pyaas paḌāv kiye rahī lekin

siyāh-baḳht gharoñ ne ghaTā nahīñ māñgī

koī shajar na ḳharīdā ḳhulūs-e-jāñ ke evaz

shadīd dhuup meñ ThanDī havā nahīñ māñgī

sukūt-e-marg laboñ ko pasand hai itnā

jo musta.ār mile vo sadā nahīñ māñgī

nuzūl-e-mausam-e-tahqīr-e-jāñ se bachne kī

gulāb aise badan ne duā nahīñ māñgī

tan-e-nahif ki KHatir rida nahin mangi

bahut dinon se KHuda se dua nahin mangi

KHud apni lash ko apne lahu se Dhanpa hai

hari ruton se gulon ki qaba nahin mangi

chhaton pe pyas paDaw kiye rahi lekin

siyah-baKHt gharon ne ghaTa nahin mangi

koi shajar na KHarida KHulus-e-jaan ke ewaz

shadid dhup mein ThanDi hawa nahin mangi

sukut-e-marg labon ko pasand hai itna

jo mustaar mile wo sada nahin mangi

nuzul-e-mausam-e-tahqir-e-jaan se bachne ki

gulab aise badan ne dua nahin mangi