tan se jaan ka qadam nikalta hai

tan se jaañ kā qadam nikaltā hai

ab koī dam meñ dam nikaltā hai

sair kar inqilāb-e-ālam kī

Thekrā le ke jam nikaltā hai

ai parī shab jo huur ko dekhā

terā andāz kam nikaltā hai

ḳhalq martī hai kū-e-qātil meñ

taur-e-mulk-e-adam nikaltā hai

chhoḌ but-ḳhāne ko tire hāthoñ

barhaman ai sanam nikaltā hai

kūcha-e-zulf se tire ai but

bach ke shaiḳh-e-haram nikaltā hai

saaf ai huur tere kūche meñ

rañg-e-bāġh-e-iram nikaltā hai

jān-e-jāñ tujh pe jaan jaatī hai

dam nikaltā hai dam nikaltā hai

teġh-e-qātil hai 'arsh' zahr-ālūd

mere zaḳhmoñ se sam nikaltā hai

tan se jaan ka qadam nikalta hai

ab koi dam mein dam nikalta hai

sair kar inqilab-e-alam ki

Thekra le ke jam nikalta hai

ai pari shab jo hur ko dekha

tera andaz kam nikalta hai

KHalq marti hai ku-e-qatil mein

taur-e-mulk-e-adam nikalta hai

chhoD but-KHane ko tere hathon

barhaman ai sanam nikalta hai

kucha-e-zulf se tere ai but

bach ke shaiKH-e-haram nikalta hai

saf ai hur tere kuche mein

rang-e-bagh-e-iram nikalta hai

jaan-e-jaan tujh pe jaan jati hai

dam nikalta hai dam nikalta hai

tegh-e-qatil hai 'arsh' zahr-alud

mere zaKHmon se sam nikalta hai