تن سے جدا ہے سانس مگر اعتبار ہے

تن سے جدا ہے سانس مگر اعتبار ہے

بے وقت ہو چکا ہوں مگر انتظار ہے

جذبات کے حباب سے کس کو فرار ہے

جو دائرہ کٹا ہے وہ آدھا حصار ہے

مدت سے بے لباس مری زندگی کا راز

اب تک مرے وجود پہ کس کا نکھار ہے

عظمت نے کر دیا ہے اسے کس قدر بلند

وہ سانس بھی جو لے تو لگے کاروبار ہے

پھولوں کو راس آ گیا بنجر ہوا کا ساتھ

کہتے ہیں مسکرا کے یہ عہد بہار ہے

ہونا تو میرا جبر تھا لیکن امرؔ ابھی

جب تک میں جی رہا ہوں مجھے اختیار ہے