tanab-e-zat kisi hath mein jami hui hai

tanāb-e-zāt kisī haath meñ jamī huī hai

ki jaise vaqt kī dhaḌkan yahīñ rukī huī hai

tujhe ravā nahīñ paiġhām vasl ke bhejeñ

lakīr hijr kī jab haath par banī huī hai

har ik darāḌ badan kī numāyāñ ho ga.ī hai

kahānī dard kī dīvār par likhī huī hai

yūñhī to ḳhvāb hameñ dasht ke nahīñ aate

hamārī aañkh kahīñ ret meñ dabī huī hai

vo mere saath kisī dā.ere meñ chal rahā hai

ghaḌī kī tīsrī suuī magar thamī huī hai

vo shaḳhs faisla kar ke gayā nahīñ tā-hāl

ki aane vaalī qayāmat abhī Talī huī hai

vo aa.ine meñ magan kuchh bhī dekhtā nahīñ hai

maiñ kyā batā.ūñ mirī jaan par banī huī hai

badan meñ ishq bhī halkore le rahā hai 'zubair'

hamāre sāmne rassī koī tanī huī hai

tanab-e-zat kisi hath mein jami hui hai

ki jaise waqt ki dhaDkan yahin ruki hui hai

tujhe rawa nahin paigham wasl ke bhejen

lakir hijr ki jab hath par bani hui hai

har ek daraD badan ki numayan ho gai hai

kahani dard ki diwar par likhi hui hai

yunhi to KHwab hamein dasht ke nahin aate

hamari aankh kahin ret mein dabi hui hai

wo mere sath kisi daere mein chal raha hai

ghaDi ki tisri sui magar thami hui hai

wo shaKHs faisla kar ke gaya nahin ta-haal

ki aane wali qayamat abhi Tali hui hai

wo aaine mein magan kuchh bhi dekhta nahin hai

main kya bataun meri jaan par bani hui hai

badan mein ishq bhi halkore le raha hai 'zubair'

hamare samne rassi koi tani hui hai