tang aa gae hain kashmakash-e-ashiyan se hum

tañg aa ga.e haiñ kashmakash-e-āshiyāñ se ham

ab jā rahe haiñ aap ke is gulsitāñ se ham

sayyād ne jo kaaT diye bāl-o-par tamām

fariyād aaj karte haiñ us bāġhbāñ se ham

bijlī chamak rahī hai nasheman kī ḳhair ho

māyūs ho ga.e haiñ kuchh ab āshiyāñ se ham

fasl-e-bahār hai ajī gaane ke roz haiñ

kunj-e-qafas meñ baiThe haiñ ik be-zabāñ se ham

har shaḳhs hai hamārī mohabbat pe tā'na-zan

tañg aa ga.e haiñ apnī hī is dāstāñ se ham

un kī navāzishāt bhī sab rā.egāñ ga.iiñ

nādim se ho rahe haiñ ab ik mehrbāñ se ham

ye shukr hai ki duur nahīñ manzil-e-murād

chhup-chhup ke jā pahuñchte haiñ har pāsbāñ se ham

ai dil mu'āf kar de 'nizāmī' kī be-ruḳhī

Darte haiñ is zamāne meñ har bad-gumāñ se ham

tang aa gae hain kashmakash-e-ashiyan se hum

ab ja rahe hain aap ke is gulsitan se hum

sayyaad ne jo kaT diye baal-o-par tamam

fariyaad aaj karte hain us baghban se hum

bijli chamak rahi hai nasheman ki KHair ho

mayus ho gae hain kuchh ab aashiyan se hum

fasl-e-bahaar hai aji gane ke roz hain

kunj-e-qafas mein baiThe hain ek be-zaban se hum

har shaKHs hai hamari mohabbat pe ta'na-zan

tang aa gae hain apni hi is dastan se hum

un ki nawazishat bhi sab raegan gain

nadim se ho rahe hain ab ek mehrban se hum

ye shukr hai ki dur nahin manzil-e-murad

chhup-chhup ke ja pahunchte hain har pasban se hum

ai dil mu'af kar de 'nizami' ki be-ruKHi

Darte hain is zamane mein har bad-guman se hum