tang-dasti ka bura ho sab se yarane gae

tang-dastī kā burā ho sab se yārāne ga.e

haañ magar apne parā.e aaj pahchāne ga.e

dosh hai qismat kā apnī ab kise ilzām deñ

ban ga.e dushman vahī ham jin ko apnāne ga.e

saikḌoñ ranj-o-alam dil meñ basā kar laa.e haiñ

jab bhī ham mahfil meñ un kī dil ko bahlāne ga.e

tujh pe bhī ilzām kuchh aaya to hogā bevafā

terī mahfil se jo uTh kar tere dīvāne ga.e

ho gayā ehsās ḳhuddārī kā 'māhir' jab se ham

ġhair ke dar par na ab tak haath phailāne ga.e

tang-dasti ka bura ho sab se yarane gae

han magar apne parae aaj pahchane gae

dosh hai qismat ka apni ab kise ilzam den

ban gae dushman wahi hum jin ko apnane gae

saikDon ranj-o-alam dil mein basa kar lae hain

jab bhi hum mahfil mein un ki dil ko bahlane gae

tujh pe bhi ilzam kuchh aaya to hoga bewafa

teri mahfil se jo uTh kar tere diwane gae

ho gaya ehsas KHuddari ka 'mahir' jab se hum

ghair ke dar par na ab tak hath phailane gae