tanha hain anjuman mein bhi aisa laga hamein

tanhā haiñ anjuman meñ bhī aisā lagā hameñ

chāroñ taraf udaas sā manzar lagā hameñ

aate dinoñ meñ jis kā havāla na ban sakeñ

maazī ke us frame se bāhar lagā hameñ

dekhā hisār-e-zāt se bāhar nikal ke jab

ik dā.era sā zehn ke andar lagā hameñ

jab aa.ine se gard kā parda utar gayā

apnī hī zindagī se bahut Dar lagā hameñ

jis kī talāsh meñ ka.ī sadiyāñ guzar ga.iiñ

jhāñkā jo dil meñ apne to andar lagā hameñ

ham bhī taḳhayyulāt kī duniyā meñ ghuum leñ

maulā bas ek din ke liye par lagā hameñ

tanha hain anjuman mein bhi aisa laga hamein

chaaron taraf udas sa manzar laga hamein

aate dinon mein jis ka hawala na ban saken

mazi ke us frame se bahar laga hamein

dekha hisar-e-zat se bahar nikal ke jab

ek daera sa zehn ke andar laga hamein

jab aaine se gard ka parda utar gaya

apni hi zindagi se bahut Dar laga hamein

jis ki talash mein kai sadiyan guzar gain

jhanka jo dil mein apne to andar laga hamein

hum bhi taKHayyulat ki duniya mein ghum len

maula bas ek din ke liye par laga hamein